Kan ein undervegs i ein prosess med direktetildeling opne for tilbod frå fleire tilbydarar, og kva vurderingar må i så fall gjerast etter innkjøpsregelverket?

Kan ein undervegs i ein prosess med direktetildeling opne for tilbod frå fleire tilbydarar, og kva vurderingar må i så fall gjerast etter innkjøpsregelverket?

Innkjøpsregelverket opnar for å direktetildele kontraktar i enkelte tilfelle. Dersom ein endrar prosessen undervegs og får tilbod frå fleire tilbydarar, kan ein bevege seg over i ein konkurransesituasjon, utan at det er reell konkurranse.

Eg forstår representanten sitt spørsmål til berre å gjelde innkjøpsregelverket. Innkjøpsregelverket skal fremme effektiv bruk av ressursane i samfunnet. Det skal også bidra til at det offentlege opptrer med integritet, slik at allmenta har tillit til at offentlege innkjøp skjer på ein samfunnstenleg måte. Dei grunnleggjande prinsippa i innkjøpsregelverket, konkurranse, lik behandling, proporsjonalitet, føreseielege forhold og moglegheit for å etterprøve prosessen, er verkemiddel for å fremme formålet i lova. Ei rekke føresegner i regelverket gir uttrykk for desse prinsippa.
Innkjøpsregelverket inneheld både unntak frå regelverket, og unntak frå plikten til å kunngjere kontrakten. Regelverket gjeld til dømes ikkje for kontraktar som oppdragsgjevar inngår med tilbydar som han sjølv har kontroll over. Videre er det til dømes heimel for å direktetildele der det berre er éin tilbydar. I det første tilfellet er tilbod frå fleire tilbydarar i prinsippet mogeleg. I det siste tilfellet vil ikkje forutsetninga for å direktetildele være til stades der tilbod frå fleire tilbydarar er mogeleg. Om oppdragsgjevar kan opne for tilbod frå fleire tilbydarar, avheng av den spesifikke heimelen for å gjere unntak frå heile eller deler av regelverket.
Der regelverket berre inneheld unntak frå plikten til å kunngjere kontrakten, kan likevel grunnleggjande prinsipp gjelde. Korleis dei grunnleggjande prinsippa og anna regelverk kjem til bruk, må avgjerast konkret ut i frå den spesifikke heimelen.