Hopp til innhold
Søndag 22. november 2026Verv, interesser og penger rundt politikerne


← Spørsmål til regjeringen

Skriftlig spørsmål nr. 618 · 2026-2027

Synest statsråden det er greitt at Statens vegvesen legg press på kommunane i saka om ny E39 Bokn-Bømlafjorden, eller skal kommunestyra fritt få vurdera dei ulike forslaga til trasear?

Ingrid Fiskaa (SV) stilte spørsmålet til samferdselsministeren, Kamzy Gunaratnam, 12. november 2026. Svaret kom 20. november 2026.

Til
Samferdselsministeren · Kamzy Gunaratnam
Datert
12. november 2026
Besvart
20. november 2026

Spørsmål

Synest statsråden det er greitt at Statens vegvesen legg press på kommunane i saka om ny E39 Bokn-Bømlafjorden, eller skal kommunestyra fritt få vurdera dei ulike forslaga til trasear?

Begrunnelse

Statens vegvesen har greia ut alternativ for ny E39 gjennom Bokn, Tysvær og Sveio. Forslaget til kommunedelplan har vore på høyring, og Statens vegvesen har no gitt si tilråding. SVV formulerer det slik i ei statusoppdatering 2. september:

«Alternativ 1 blir anbefalt på alle delstrekningane, bortsett frå Susort–Slåttevik, der Statens vegvesen aksepterer at alternativ 2 blir valt.»

Ordet «aksepterer» er talande for SVV sin framgangsmåte i saka. Sjølv om regjeringa i 2023 avgjorde at kommunedelplanen skulle behandlast etter Plan- og bygningsloven § 3-7 med kommunane som planmyndigheit, er det lite som tyder på at Statens vegvesen i første rekke opptrer som ein fagleg rådgivar. I ei sak som vil ha vidtrekkande konsekvensar for lokalsamfunn og natur, framstår SVV som ein pådrivar ikkje berre for prosjektet som heilskap, men også for dei alternativa som er aller mest inngripande. Lokale folkevalde blir gitt «informasjon» i lukka møte, og får presentert at andre alternativ enn dei SVV ønskjer seg berre vil føra til forseinkingar og problem.
Spørsmålet som melder seg er kva den kommunale planmyndigheita er verdt når kommunestyra ikkje opplever at dei har eit reelt politisk val. Og når lokale folkevalde ikkje har mykje dei skulle ha sagt, gjeld det i endå større grad for innbyggarane.

Svar

Samferdselsministeren Kamzy Gunaratnam, 20. november 2026

Statens vegvesen har etter avklaring med Samferdselsdepartementet utarbeidd forslag til kommunedelplan for E39 Bokn–Bømlafjorden. Forslaget til ny E39 Bokn–Bømlafjorden omfattar ei strekning på om lag 58 km gjennom kommunane Bokn, Tysvær og Sveio i Rogaland og Vestland fylke. Planlegginga er gjennomført etter pbl. § 3-7 «Overføring av planforberedelse til statlig eller regional myndighet». Kommunen er planmyndigheit og skal fatte planvedtak.
Varsel om oppstart av planarbeidet blei sendt i 2022, og forslag til planprogram etter pbl. § 4-1 blei sendt på høyring og lagt ut til offentleg ettersyn våren 2024. Planprogrammet blei fastsett i juni 2024 i alle dei tre kommunane. Planprogrammet la grunnlaget for det vidare planarbeidet, mellom anna at to gjennomgåande alternativ skulle konsekvensutgreiast.
Statens vegvesen planlegg og byggjer ut riksvegar på vegne av staten, og er av den grunn både forslagsstillar og tiltakshavar. Statens vegvesen skal planlegge nye riksvegar med god framkomst og høg trafikktryggleik, samstundes som ein tek omsyn til miljømål. Vegvesenet skal òg søkje kostnadseffektive løysingar innanfor dei økonomiske rammene som gjeld. Forslaget til kommunedelplan med konsekvensutgreiing blei lagt ut til høyring og offentleg ettersyn i perioden 9. februar til 23. mars 2026. Det kom inn om lag 350 merknader til planforslaget.
Myndigheitsorgan med motsegnrett kan fremje motsegn til arealplanar i spørsmål som er av nasjonal eller vesentleg regional betydning, eller som av andre grunnar er av vesentleg betydning for saksområdet deira. Statens vegvesen er eitt av myndigheitsorgana som har rett til å fremje motsegn etter pbl. § 5-4 og har fremja motsegn til alternativ 2 på tre av delstrekningane i Bokn kommune. Motsegna mellom anna grunngjeven med at alternativ 2 har vesentleg høgare kostnad og lågare samfunnsnytte enn alternativ 1.
Statens Vegvesen opplyser at etter høyringa, blei planmaterialet med merknadsbehandling presentert for alle dei tre kommunestyra og sendt over til kommunane for politisk behandling. Forslaget som er oversendt, er justert etter dialog mellom berørte styresmakter som hadde varsla motsegn til planforslaget. Statsforvaltaren har samordningsansvaret for dette arbeidet og kan òg avskjere motsegner frå styresmakter med motsegnsrett.
For Tysvær og Sveio kommunar er planforslaget i tråd med merknadene frå kommunane. For Bokn kommune er forslaget i tråd med tilrådingane frå Statens vegvesen, Rogaland fylkeskommune og Statsforvaltaren i Rogaland, medan merknadene frå Bokn kommune ikkje er tekne til følgje. Planforslaget er oversendt til kommunane og kan vedtakast med rettsverknad dersom det ikkje ligg føre motsegner til dei delane som blir vedtekne. Dersom Bokn kommune vedtek ei løysing som Statens vegvesen eller andre styresmakter har motsegn til, vil den delen av planen motsegna gjeld bli avgjord av Kommunal- og distriktsdepartementet.
Ut frå dei opplysningane eg har fått, er planarbeidet gjennomført i tråd med føringane i plan- og bygningslova, og kommunane har fått saka til behandling i samsvar med den rolla dei er tillagde som planmyndigheit.

Spørsmålet på stortinget.no ↗Flere spørsmål fra Ingrid Fiskaa →

Kilde: Stortingets åpne data (NLOD). Teksten er gjengitt slik den står hos Stortinget.