Manal og mora Tamara som vart evakuert frå Gaza til Noreg for medisinsk behandling i desember i fjor ventar framleis på gjenforeining med far og veslebror. Samtidig er tilstanden deira ytterlegare …

Manal og mora Tamara som vart evakuert frå Gaza til Noreg for medisinsk behandling i desember i fjor ventar framleis på gjenforeining med far og veslebror. Samtidig er tilstanden deira ytterlegare forverra.
Kva vil utanriksministeren gjera for å sikra Manal og Tamara - som Noreg har påtatt seg særskilt ansvar for gjennom medisinsk evakuering - den grunnleggande menneskeretten det er å ha eit familieliv?

Eg viser til tidlegare spørsmål nr. 2131 (2024-2025) om same sak.
Fire år gamle Manal vart medisinsk evakuert frå Gaza for behandling i Noreg for eit år sidan og kom hit saman med mor Tamara. Far Ahmad og veslebror Rajab er igjen i Gaza.
Ahmad og Rajab har fått opphaldsløyve av UDI, men vedtaket går ut i februar og den humanitære situasjonen i Gaza er frykteleg. Teltet dei bur i er oversvømt grunna vinteren og avløpssystemet som er øydelagt av israelske angrep. Vatn, kloakk og søppel flyt i gatene og madrassane dei søv på er gjennomvåte.
Den Internasjonale Raude Krosskomiteen kan hjelpa faren og veslebroren med å koma seg til grensa, men det er naudsynt med konsulær bistand for å få familien trygt ut av Gaza, gjennom Israel, Jordan eller Egypt og hit til Noreg.
ICRC har uttrykt at dei i visse tilfelle kan hjelpa med delar av evakueringa, men dette gjeld prosessen inne på Gaza. Grensekryssinga ut av Gaza, videre reise gjennom Israel, grensekryssing inn i Jordan og vidare reise til Noreg er umogleg utan konsulær bistand frå norske styresmakter.

Norske styresmakter har over lang tid bistått personar som kan få konsulær bistand frå Noreg med å reise ut av Gaza. Det er gitt tilbod om assistert utreise til norske borgarar og utanlandske borgarar som er busette i Noreg, samt til nære familiemedlemmer av desse som har gyldig opphald i Noreg og reiser saman med dei. Vi har bistått om lag 300 personar med utreise.
For å kunne bistå denne gruppa personar med assistert utreise frå Gaza, har ein i praksis òg måtta sørgje for vidare transport ut av regionen og til Noreg. Norske styresmakter har måtta yte ein betydeleg grad av konsulær bistand i desse sakene, både når det gjeld sjølve grensekryssinga og med etterfølgjande hjelp til vidare reise.
I sakene som representanten sitt spørsmål gjeld, er mor og dotter i Noreg gjennom Medevac-ordninga, medan far og eit barn er i Gaza. Medisinsk evakuering frå Gaza vart etablert for å hjelpa og tilby behandling til flest moglege pasientar innanfor ein kvote på 100 for å avlasta helsesystemet i Gaza. Val av pasientar og deira oppførte følgjepersonar baserer seg på lister frå Verdshelseorganisasjonen. Diverre er det slik at familiar kan bli splitta i samband med at pasientar får tilbod om medisinsk behandling i Noreg eller andre land gjennom Medevac-ordninga.
I sakene som representanten sitt spørsmål gjeld, dreier det seg om å bistå utanlandske borgarar som nyleg har fått opphaldsløyve i Noreg, men som ikkje er busette i Noreg, med både grensekryssing og vidare hjelp. Norske styresmakter kan dessverre ikkje påta seg å yte same type bistand til denne gruppa som til norske borgarar. Ei innvilga opphaldsløyve i Noreg gir ein rett til innreise i riket, men norske styresmakter kan ikkje påta seg å sørgje for at alle som har fått ei løyve, kan kome seg hit og ta i bruk løyvet. Det gjeld både personar som oppheld seg på Gaza og andre stader det kan vere vanskeleg å reise til Noreg frå.
Eg har tidlegare svara på spørsmål om bistand til utreise frå Gaza for dei denne saka gjeld, samt andre personar i liknande situasjon. Eg viser her til mine tidlegare svar til representant Fiskaa den 13.05.2025, samt til representant Hege Bae Nyholt den 26.11.2025.