Er statsråden enig i at finansieringsmodellane for aktørar i distrikts-Noreg som organiserer og tilrettelegg for desentralisert utdanning bør bli meir langsiktige, og vil regjeringa legge til rette for dette i komande statsbudsjett?

Er statsråden enig i at finansieringsmodellane for aktørar i distrikts-Noreg som organiserer og tilrettelegg for desentralisert utdanning bør bli meir langsiktige, og vil regjeringa legge til rette for dette i komande statsbudsjett?

I mai 2022 lyste Kunnskapsdepartementet via HK-dir. ut midlar til utdanningssenter og andre aktørar som arbeider for desentralisert utdanning. Midlane gjeld for inneverande år (2022), med tildeling i juli og retta inn mot tiltak som kan gjennomførast i inneverande år.
Dette er positivt, men dersom ein skal bygge gode strukturar som kan skape langsiktig verdiskaping og kompetanseheving i distriktsregionar i Noreg, er det viktig at finaniseringsordningane for desentralisert utdanning blir meir langsiktige og føreseielege. Ei slik omlegging vil vere i tråd med måla regjeringa sjølv har sett for framtidas desentraliserte utdanningstilbod, og gjere det lettare for både lokale aktørar, næringslivet i distrikts-Noreg og dei etablerte høgare utdanningsinstitusjonane å rette ressursane inn mot det som verkeleg er viktig: Organisering, strukturering og tilrettelegging av ein desentralisert utdanningsstruktur skreddarsydd til behova i næringsliv og samfunn i distriktsregionar der det ikkje er høgskular/universitet i dag.
Eg syner mellom anna til «Studiehub»-modellen utvikla av Inviro i Nordfjord i Vestland fylke, som er presentert for departementet og er éin mulig modell for korleis dette kan strukturerast.

Eg er glad representanten har merka seg regjeringa si ambisiøse politikk for å sikre god tilgang på kompetanse for næringsliv og offentlege tenester i heile landet. Slik vi slår fast i Hurdalsplattforma, vil studiesenter ha ei viktig rolle i dette arbeidet. Denne regjeringa er den første som har etablert ei eiga finansieringsordning for studiesenter. Som representanten viser til blei midla lyst ut i mai i år med frist for å søke i juni. Det har kome en rekke søknadar, som no handsamast av Direktoratet for høgare utdanning og kompetanse (HK-dir.). Etter planen vil ei avgjerd om kven som får tildelt midlar vere klar i første halvdel av juli i år. Regjeringa er opptatt av at midlane kjem til nytte så raskt som mogleg.
Representanten spør om regjeringa vil legge til rette for ei langsiktig finansiering av aktørar som organiserer og legg til rette for desentralisert utdanning. I utlysinga av ordninga er det gjort klart at det er ein intensjon at den søknadsbaserte ordninga for studiesenter skal vare over nokre år, sjølvsagt med atterhald om framtidige løyvingar frå Stortinget. Når regjeringa legg fram dei årlege statsbudsjetta vil representanten få svar på korleis dette arbeidet blir prioritert framover.