Er statsråden einig i at effektive trafikktryggingstiltak på eksisterande vegar som gul midtstripe, bør prioriterast før nye motorvegprosjekt, og vil statsråden prioritera gul stripe på E39 i kommande Nasjonal transportplan?

Er statsråden einig i at effektive trafikktryggingstiltak på eksisterande vegar som gul midtstripe, bør prioriterast før nye motorvegprosjekt, og vil statsråden prioritera gul stripe på E39 i kommande Nasjonal transportplan?

I samband med framlegginga av Nasjonal transportplan 2025–2036 viste regjeringa til at hovudstrategien for transportpolitikken er å ta vare på det me har, utbetra der me kan og byggja nytt der me må. Regjeringa har òg uttrykt at ein vil byggja «gode nok» vegar og prioritera vedlikehald og oppgradering av eksisterande infrastruktur framfor nye motorvegar.
Samstundes er det framleis om lag 50 kilometer av kyststamvegen E39 mellom Stavanger og Trondheim utan gul midtstripe. Vedlikehaldsetterslepet på fylkesvegane er dessutan enormt, særleg i Vestland. Eit breitt samarbeid mellom miljøorganisasjonar og transportnæringa i vest har no teke til orde for å prioritera ein trygg og farbar kyststamveg og Bybanen, framfor nye og kostbare motorvegprosjekt. Gul stripe på heile E39 gjev farbar og trafikksikker veg, samstundes slik 0+-planlegging gjev meir vern av natur og klima.

Å ta vare på det vi har, utbetre der vi kan og byggje nytt når vi må er regjeringas hovudstrategi for transportpolitikken og for riksvegnettet i Nasjonal transportplan 2025–2036. Regjeringa vil snu ei utvikling der kritisk transportinfrastruktur ikkje blir halden ved like i takt med behovet, ved å prioritere drift, vedlikehald og utbetringar høgare enn tidlegare. Statsbudsjetta for 2025 og 2026 viser at regjeringa følgjer hovudstrategien. Samstundes er det av og til behov for å gjennomføre store prosjekt. Til dømes gjennomfører vi prosjektet Fellesprosjektet Vossebana/E16 Arna–Stanghelle i Vestland for å kunne erstatte ei skred- og ulykkesutsett strekning med ny og trafikksikker veg. Vi gjennomfører prosjektet E134 Oslofjordforbindelsen, byggetrinn 2 i Akershus for å kunne gi ei sikker kryssing av Oslofjorden og auke oppetida på vegen.
Hovudstrategien med å ta vare på det vi har, utbetre der vi kan og bygge nytt når vi må skal bli vidareført og lagt til grunn for arbeidet med Nasjonal transportplan 2029–2040. Det vil vere relevant for det seinare arbeidet med å vurdere ressursbruken i transportplanen, men eg vil ikkje forskottere prioriteringar i kommande transportplan ved å prioritere konkrete tiltak no.