Skriv, meldingar, drøftingar, orienteringar, spørsmål og interpellasjonar - kommunestyret 27. november 2025

Følgjande skriv, meldingar, drøftingar, orienteringar, spørsmål og interpellasjonar vart handsama:

A. Skriv og meldingar 1a og b:Retningsliner for bruk av kunstig intelligens i Sogndal kommune

2: Protokollar frå råd og utval

B. Drøftingar

C. Orienteringar

1. IT-sikkerheit v/leiar IT-drift, Frode Rønning

2. Omsorgstrappa v/tenesteleiar fysio, ergo og friskliv; Jorunn Albertsen, og rådgjevar folkehelse; Silje Fimreite

3. Endrings- og omstillingsarbeidet i helse og omsorg v/ tenesteleiar institusjon; Hanne Hoff, tenesteleiar fysio, ergo og friskliv; Jorunn Albertsen, rådgjevar folkehelse; Silje Fimreite, tillitsvald Norsk sjukepleiarforbund; Elin Christensen, og tillitsvald Fagforbundet; Anne Elisabeth Lunde.

4. Bemanningssentralen v/konstituert kommunalsjef støttetenester; Elin Henjesand Kvam

4. Vertskommunesamarbeid Nav v/Rigmor Onarheim, prosjektleiar for utgreiing av vertskommunesamarbeid om Nav-kontor i Sogn.

D. Spørsmål

May Kristel Bødal (Sp):

1. Når kjem saka om vertskommunesamarbeidet som omhandlar NAV-samarbeidet? Eg registrerer at tilrådinga frå KO-et er sett og at tre av kommunane allereie har behandla saka i sine formannskap.

Svar: Kommunalsjef for oppvekst, Kenth Rune Teigen Måren For Sogndal kommune har ein lagt opp til at saka vert handsama av utval for levekår 03.12.2025, Formannskapet 04.12.2024 og slutthandsama i kommunestyret 18.12.2025

May Kristel Bødal (Sp):

2. Etter kva eg har forstått, så skal Sogndal kommune jobbe med Leselyststrategien 2024 - 2030: Saman om lesing. "Norske barn og unge har lågare leselyst og dårlegare leseferdigheter enn før. Det er en utvikling me skal snu. Me skal auke leseferdigheitene til barn og unge, skape leselyst og leseglede. Me veit at jo meir me les, desto betre lesarar blir me" står det innleiingsvis i strategien. Kva er stoda her? Kva tiltak er gjort og kva er eventuelt planlagt vidare? Er det satt av pengar i budsjettet til å skape rom for leselyst rundt om i barnehagane og på skulane i kommunen?

Svar: Frode Kristian Grøttebø, tenesteleiar for skule Lesing er saman med arbeid mot skulefråvær dei prioriterte innsatsområda i åra framover. I arbeidet med lesing er det sett ned ei arbeidsgruppe med lærarar og skuleleiarar frå alle skulane i kommunen. Gruppa har gjennomført ei spørjing for å kartlegge nosituasjonen i arbeidet med lesing. Sogndalsskulen har eigen plan for fagleg oppfølging av elevane og skulane har eigne språk -og leseplanar. Desse planane blir i tida framover revidert og det blir sett inn nye tiltak, både som felles kompetansehevingar og tilpassa den einskilde skule. Dei tilsette i skulane og barnehagane arbeider med å skape rom for leselyst kvar dag. Det er ikkje sett av eigne midlar i budsjettet, men kommunen vil søke eksterne tilskot til arbeidet. Mellom anna Udir sitt tilskot til skulebibliotek. May Kristel Bødal (Sp):

3. I lys av at tidlegare barnevernsleiar Trude Rød sto fram i Sogn Avis og fortalde om sine opplevingar som leiar i kommunen og at ho fekk, noko som eg vil kalle ein “hysj-avtale” der ho fekk avtale om å gå frå jobben sin umiddelbart med tre månader etterlønn mot at ho ikkje snakkar negativt om kommunen. Eg forstår at administrasjonen står fritt til å handtere tilsette utan innblanding frå oss politikarar, men eg meiner at me må gje sterke signal til administrasjonen at me ikkje vil ha det slik at folk kjenner seg pressa til tausheit og samstundes må tåle den typen behandling som Trude Rød opplevde.

Sogndal kommune skal vere ein trygg og god arbeidsgjevar for alle tilsette. Eg er glad for at kommunen no ber Trude Rød om unnskyldning. Men, dette får meg til å undre over kor mange andre slike “Hysj-avtalar” er gjort? Kor mange andre er “trua” til å halde munn mot at dei får gå frå stillinga si “i stillheit”? Kor mykje pengar snakkar me om her? Kan me no forvente at det dukkar opp fleire som kan trenge unnskyldning frå kommunen?

Svar: Kent Rune Teigen Måren, konstituert kommunedirektør:

Kommunen har svara ut innsynskrav tilknytt avtalar om fråtreden. Frå 2021 er det inngått 9 sluttavtalar. Ein av desse er gjort i eit forlik. Det er vist til “Hysj”-avtalar det er ulik formulering av teieplikt/konfidensialitet i avtalane. Vi kan difor ikkje gi svar på dette konkret utan å gå inn i kvar avtale. Kostnadane i sluttavtalane inneheld alle ein periode med lønn utan arbeidsplikt, fire av avtalane inneheld ulike variantar vederlag ifm. at ein avsluttar arbeidstilhøvet med kommunen.

May Kristel Bødal (Sp):

4. Er det utsikter til lyspunkter i form av LED-lys-stolper langs dei kommunale vegane våre, då spesifikt Skogavegen, frå Skogly og iallefall opp til krysset der vegen deler seg i Skogavegen og Øvste Skogen? Her går det folk til alle døgnets tider heile året. Det er ein velkjent trim- og tur-runde for folk frå store delar av kommunen i tillegg til dei fleste på Kaupanger. Og skuleungar som ikkje har skuleskyss må gå langs vegen i all slags vêr også når det er mørkt, til skulen på morgonen og til ulike aktiviteter på kveldstid.

Svar: Torgeir Bang konstituert kommunalsjef Teknisk drift Det er per no ingen konkrete planar for etablering av veglys/LED-lys langs Skogavegen, men vi tek med oss innspelet i det vidare planarbeidet for oppgradering av veglys. Tiltaket blir vurdert i ein heilskap der vi ser på både lys og vegutbetring, slik at vi får ei god og framtidsretta løysing.

Erlend Fardal Lunde (Ap):

5.Ruskonsulent I kommunestyret 13. mars var tema om erfaringskonsulent på rus oppe i ein interpellasjon. Kva er status knytt til eksterne midlar og administrasjonen si utgreiing?

Svar: Marit Reppen, kommunalsjef helse og omsorg:

Sogndal kommune kan søkje på prosjektmidlar til dette tiltaket gjennom Statsforvaltar. Søknadsfrist 1.2.26. Dette er same tilskot som ein har nytta til å tilsetje utekontaktar og tilføre ekstra kapasitet til tenesta Rask psykisk helsehjelp (RPH). Det vere viktig før ein søkjer på prosjektmidlar at ein gjer ein grundig kartlegging og vurderer eit reelt behov for erfaringskonsulent, samt korleis vi kan nytte erfaringskonsulent godt i kommunen vår. Me vil jobbe med dette i tida fram til søknadsfrist.

Erlend Fardal Lunde (Ap):

6. Språkpraksis i barnehagar I utval for levekår førre veke viste kommunalsjef til eit suksessfullt prosjekt med språkpraksiskandidatar fra Ukraina i barnehagane. Det vart vist til at det skulle koma eit notat om dette, men sidan alle parti no er i innspurten på sine prioriteringar inn mot budsjettprosess kan det vera relevant å få nokre kulepunkt fortalt i kommunestyret i dag?

Svar: Kjell Ertesvåg, tensteleiar for barnehagane Prosjektet med språkpraksiskandidatar frå Ukraina i barnehagane har vore svært vellukka. Målet er å kvalifisere busette flyktningar til arbeid i barnehage. Sogndal kommune har vore med i ein pilot med UDIR, og mange har gjennomført kurs om norsk barnehage, SFO og skule. I 2025 har 15 personar vore i språkpraksis, og 5 av dei er no tilsett i vikariat eller engasjement. Tiltaket gir integrering, tilgang på kompetente vaksne og påverkar økonomien lite då praksis vert finansiert av NAV.

Erlend Fardal Lunde (Ap):

7. Bussparkering ifbm prosjekt på Billagstomti Det har vore ein del oppe i media i det siste knytt til VLFK si lokalisering av bussdepot i kommunen. Kva rolle har kommunen i dette no der det er ei viss motstrid mellom TIDE og VLK knytt til lokalisering? Det er utruleg viktig for prosjektet at denne ballen blir landa, sidan føresegnene fra områdeplan er tydeleg på at dette må vera løyst før løyve til tiltak vert gitt.

Svar: Bente Mossige Ask, konst.kommunalsjef plan og eigedom, og Torgeir Bang, konst.kommunalsjef teknisk drift. I denne saka er det fylkeskommunen og fylkestinget som gjer vurderingar og vedtak. Dei har forholdt seg til retningslinjer for involvering av kommunen, og me opplever å ha hatt eit godt og konstruktivt samarbeid. Vurderinga av løysingsalternativ ligg til fylkeskommunen, og dei har vurdert at Kaupanger er det beste tilgjengelege alternativet for bussoppstillingsplass.

Kommunen har rolla som planmynde i saka, og handsamar innkomne søknader knytt til arealbruk. Rammeløyve til etablering av bussdepot vart gitt 24.11.25. I tillegg har eigedomsavdelinga bidrege ved behov med oversikt over tilgjengelege areal og avklaringar knytt til planstatus og anna relevant informasjon, og teknisk avdeling har bidrege med avklaringar og innspel knytt til vatn, avløp, overvatn og anna infrastruktur.

Erlend Fardal Lunde (Ap):

8. Utvala ynskjer å vere meir påkobla i budsjettprosessen i 2026. Svar: Stig Ove Ølmheim, ordførar Vart svara ut i møte.

Erlend Fardal Lunde (Ap):

9. Parkeringsgruppa i Sogndal, vidare oppfølging.

Svar: Stig Ove Ølmheim, ordførar Vart svara ut i møte.

Bjarte Haugen (V):

10. Korleis er samarbeidet med Studentane i Sogndal, me fekk i sommar fleire innlegg i SA om kva dei ynskjer og forventar av Sogndal som studiestad. Eg har etterspurd noko meir handling frå oss som kommune og har fått tilbakemelding at me skal ha møte saman med studentsamfunnet og studentar, ikkje berre leiing frå HVL og SV slik at alle vert høyrd.

Når kan me forvente at dette skjer?

Svar: Stig Ove Ølmheim, ordførar Vart svara ut i møte.

Håkon Nesse (H):

11. Gatelys i Røysavegen på Leikanger vart øydelagd for nokre veker sidan, er det ein plan for å få det på plass att?

Svar: Kenth Rune Teigen Måren, konstituert kommunedirektør Vart svara ut i møte.

E. Interpellasjonar 1: Frå Haavard Stensvand (Ap):

Tilbod til eldre (sjå vedlegg E1)

Interpellanten trakk sin interpellasjon då han fekk gode svar under orientering C3.

Kommunestyret si handsaming av sak 80/2025 i møte den 27.11.2025:

Handsaming