Plan for friluftslivets ferdselsårer

1. Plan for friluftslivets ferdselsårer blir vedteken med følgjande redaksjonell endring:

Setninga som lyder "Tiltaket kan gjerast godt tilgjengeleg eller universelt utforma for funksjonsnedsette" vert endra til "Tiltaket kan gjerast godt tilgjengeleg eller universelt utforma for menneske med nedsett funksjonsevne".

2. Kommunedirektøren får fullmakt til å gjere endringane i planen til same format som resten av planen.

3. Plan for friluftslivets ferdselsårer skal rullerast når arbeidet med tiltaka i planen har kome så langt at kommunedirektøren meiner det er behov for å oppdatere tiltakslista.

4. I gjennomføringa av tiltak vert grunneigar teken med på råd.

Kommunestyret si handsaming av sak 92/2024 i møte den 12.12.2024:

Handsaming

Frå utval for levekår låg det føre slik tilråding:

1. Plan for friluftslivets ferdselsårer blir vedteke slik den føreligg.

2. Kommunedirektøren får fullmakt til å gjere endringane i planen til same format som resten av planen.

3. Plan for friluftslivets ferdselsårer skal rullerast når arbeidet med tiltaka i planen har kome så langt at kommunedirektøren meiner det er behov for å oppdatere tiltakslista.

Endringsframlegg:

Miljøpartiet Dei Grøne og Sosialistisk Venstreparti sette fram slikt framlegg om redaksjonell endring i Plan for friluftslivets ferdselsårer og i tilhøyrande sakspapir:

Setninga som lyder "Tiltaket kan gjerast godt tilgjengeleg eller universelt utforma for funksjonsnedsette" vert endra til "Tiltaket kan gjerast godt tilgjengeleg eller universelt utforma for menneske med nedsett funksjonsevne".

Grunngjeving: Orda vi vel å bruke for å skildre menneskegrupper er viktige, og sidan ingen er berre funksjonsevna eller -nedsettinga si, må vi unngå å bruke omgrep som "funksjonsnedsette".

Kristeleg Folkeparti sette fram slikt framlegg til nytt punkt:

I gjennomføringa av tiltak vert grunneigar teken med på råd.

Avrøysting:

Framlegget frå Miljøpartiet Dei Grøne og Sosialistisk Venstreparti vart samrøystes vedteke. Framlegget frå Kristeleg Folkeparti vart samrøystes vedteke. Tilrådinga frå utval for levekår vart vedteken mot røystene frå Malén Røysum (Sp) og Magne Bruland Selseng (Sp).