2. gangsbehandling - Detaljregulering for Ullvarehagen bustadområde - Rosendal - 82/94 med fleire - PlanID 20220007

Kommunestyre i Kvinnherad kommune godkjenner forslag til detaljregulering for detaljregulering for Ullvarehagen bustadområde – Rosendal – 82/94 med fleire (PlanID 20220007) med heimel i plan- og bygningslova (pbl) § 12-12.

Vedtaket vert gjort på følgjande vilkår før kunngjering:

1.Avkøyrsel frå arealføremål V3 til føresegnsområde #1-3 for parkeringskjellar for BB3 skal regulerast i plankartet med tilhøyrande føresegn. 2.UTE4 er tilstrekkeleg uteopphaldsareal for BB5. Areal utanfor byggegrenser for BB som er egna til uteopphaldsareal, inngår i utomhusplan jf. § 2.11.1, og opparbeidast som uteopphaldareal. 3.Arealføremål V1-5 skal regulerast med felles eigarform for BB på følgjande måte i § 2.7.1:

-f_V1 er felles for BB1 -f_V2 er felles for BB2 -f_V3 er felles for BB1, BB2, BB3, BB5 og B/T -f_V4 er felles for BB5 og B/T -f_V5 er felles for BB5 4.Arealføremål f_V6, f_FO3, f_BG og f_AVG langs Melselva skal regulerast utan eigarform på følgjande måte: V6, FO3, BG og AVG. 5.Ved søknad om tiltak for f_V6, f_FO2 og f_AVG skal terrenginngrep langs Melselva dokumenterast. Ved terrenginngrep skal det før ferdigattest for tiltaka innanfor f_V6, f_FO2 og f_AVG vere utarbeidd FDV-plan for erosjonssikringa langs Melselva langs f_V6. Dersom tiltaka medfører at det må gjerast tiltak i eksisterande erosjonsikring, skal erosjonssikringa gjennoppbyggjast med naudsynt sikring før ferdigattest for f_V6, f_FO2 og f_AVG, og det skal samstundes vere utarbeidd ein FDV-plan. FDV-plan skal vere utarbeidd av fagkyndige.

Administrasjonen får mynde til å gjennomføre tekniske endringar i plandokumenta før kunngjering av vedtaket. Vedtaket vert kunngjort i samsvar med plan- og bygningslova § 12-12 fjerde ledd. «KRAV OM OMRÅDELEIKEPLASS GÅR UT AV PLANEN» OG FØLGJANDE PUNKT VERT STROKE I REGULERINGSFØRESEGN:

2.10.6 Det skal etablerast områdeleikeplass i Rosendal. Områdeleikeplassen skal ha gangavstand på 750 m til planområdet. Områdeleikeplass skal innehalde varierte aktivitetar for born og unge i ulike aldersgrupper, med funksjons- og kvalitetskrav i samsvar med § 2.3.4."

Punkt 6.7 utgår også som følge av dette.

Begrunnelse for ikkje å stille krav om områdeleikeplass i Ulvarehagen, Rosendal Det er ikkje stilt krav om etablering av eiga områdeleikeplass i planforslaget for Ulvarehagen. Dette er vurdert som unødvendig fordi området allereie har god tilgang til eksisterande leike- og aktivitetsflater i nærleiken. Etter ei samla vurdering oppfyller desse tilboda funksjonen til ei områdeleikeplass, både når det gjeld avstand, tilgjenge og innhald. I planområdet og dei næraste omgjevnadene finst det fleire etablerte leike- og opphaldsareal som er lett tilgjengelege via trygge ganglinjer. Desse omfattar mellom anna nærsoneleikeplassar og større fellesområde som gir eit variert leiketilbod for ulike aldersgrupper. Samla sett gir dette eit tilfredsstillande dekka behov for både nær- og områdefunksjonar. Vidare vurderast det som lite føremålstenleg å etablere ei ny områdeleikeplass innanfor det relativt avgrensa planområdet, då dette ville medføre unødvendig arealbruk og fragmentering av grøntstruktur. Ei slik etablering ville heller ikkje styrke tilbodet vesentleg samanlikna med dei eksisterande områda som ligg nærare eller like nært for dei fleste framtidige bebuarar. På bakgrunn av dette vurderer kommunen at kravet til uteopphalds- og leikeareal er tilfredsstillande ivareteke gjennom eksisterande tilbod, og at det ikkje er grunnlag for å stille ytterlegare krav om ei eiga områdeleikeplass i Ulvarehagen.

Kommunestyret si behandling i møte den 19.03.2026:

TILLEGGSFORSLAG FRÅ GUNNAR HELLELAND, INP:

Kommunestyret ber om at vegen i Ullvarehagen bustadområde – Rosendal byggast som samleveg med minimum 5–6 m køyrebane, i samsvar med vedtatt vegnorm for Kvinnherad frå 2022. Vegen skal betjene både dei 60 nye bueiningane og eksisterande bustader, samt Steinparken og ridebane, som i periodar har stor trafikk. Bussparkeringa i starten av vegen skaper uoversiktlege forhold, og ei breiare veg sikrar trygg framkome. Vegen må ha rekkefølgekrav og vere ferdig før bustadane byggast, noko som vil gagne alle som brukar vegen, særleg i anleggsfasen. Dette er ei investering for framtida: vegen må vere skikkeleg og framkomstvenleg også langt fram i tid. ENDRINGSFORSLAG FRÅ BJØRN OLAV TVEIT, AP:

Krav om områdeleikeplass vert teke inn i planen:

2.10.6 Det skal etablerast områdeleikeplass i Rosendal. Områdeleikeplassen skal ha gangavstand på 750 m til planområdet. Områdeleikeplass skal innehalde varierte aktivitetar for born og unge i ulike aldersgrupper, med funksjons- og kvalitetskrav i samsvar med § 2.3.4."

Habilitetsspørsmål:

Per Harald H.L.Johansen, AP, er automatisk inhabil då han er næraste nabo til reguleringsplanen for Ullvarehagen. Knut Johannes Helvik, H, er automatisk inhabil då han er styreleiar i Vollakvernfallet AS og har økonomiske interesser i selskapet. Vollakvernfallet AS eig(festeavtale) deler av arealet som denne reguleringsplanen omfattar. Dei gjekk frå møtet under handsaminga. Lars Røyrvik, AP, gjekk inn i møtet som vara for Per Harald H.L.Johansen, AP. Ingen vara for Knut Johannes Helsvik - 34 røysteføre i denne saka.

Spørsmål i møtet:

SPØRSMÅL FRÅ INP:

Reguleringsplanen for Ullvarehagen opnar for veg, mur og fylling langs Melselva innanfor flaumsona, samstundes som ROS-analysen og fagrapport viser til usikkerheit rundt den eksisterande erosjonssikringa frå 1981, og anbefaler utarbeiding av ein FDV-plan for oppfølging. Korleis meiner kommunen at desse tiltaka er tilstrekkeleg vurdert opp mot erosjonsfare ved inngrep i elveløpet, og er det avklart kven som skal ha ansvar for gjennomføring av FDV-plan, tilsyn og eventuell utbetring av erosjonssikringa i framtida – slik at kommunen ikkje sit att med ansvaret?

SVAR FRÅ KOMMUNEDIREKTØR:

Gjeldande tiltak i elva/elvekanten så har det vore motsegn frå NVE. Tilrådinga frå dei var å følgje opp dette i føresegnene. Motsegna vart trekt 17.02.2026 og difor har administrasjonen lagt dette inn i vilkår 5 i innstillinga, der det er sett som vilkår at ved terrenginngrep skal det før ferdigattest for tiltaka innanfor f_V6, f_FO2 og f_AVG vere utarbeidd FDV-plan for erosjonssikringa lags Melselva lang f_V6. Det er vidare teke inn at dersom tiltaka fører til at det må gjerast tiltak i eksisterande erosjonssikring, skal erosjonssikringa gjenoppbyggast med naudsynt sikring før ferdigattest. Det er også sett krav om at FDV-plan skal vere utarbeidd av fagkyndige. Etter kommunen si vurdering er det då tilstrekkeleg klart at det er utbyggar sitt ansvar å gjennomføre FDV-plan, tilsyn og eventuell utbetring av erosjonssikringa i framtida.

Røysting:

Forslaget frå Gunnar Helleland, INP, fall med 5 mot 29 røyster.

Desse røysta for: Esben Zimmer (INP), Gunnar Helleland (INP), Heidi Bolette Jakobsen (INP), Thomas Eide (INP), Åge Aakre (INP)

Endringsforslaget frå Bjørn Olav Tveit fall med 13 mot 21 røyster.

Desse røysta for: Bjørn Olav Tveit (AP), Monica Lindseth (AP), Thea Vaage (AP), Esben Zimmer (INP), Gunnar Helleland (INP), Heidi Bolette Jakobsen (INP), Thomas Eide (INP), Jostein Saghaug (MDG), Jarle Andresen (SP), Hildegunn Hanstvedt Tofte (SV), Silje Nordveit Olsen (SV), Wermund Vetrhus (SV), Maren Elise Skogseth (V) Til slutt vart det røysta over innstillinga frå Plan, teknikk og miljøutvalet. Her røysta 31 for innstillinga og 3 røysta mot. Den vart dermed vedteke.

Desse røysta mot: Hildegunn Hanstvedt Tofte (SV), Silje Nordveit Olsen (SV), Wermund Vetrhus (SV)