Klagebehandling - Detaljregulering for Husnes kollektivterminal og sentrumsveg, 144/68 med fleire - PlanID 20200011 (2020/3228)

Kvinnherad kommunestyre tek ikkje klagen til følgje og opprettheld sitt vedtak av 14.12.2024 som følgjer:

Kvinnherad kommunestyre godkjenner i medhald av plan- og bygningslova § 12-12, forslag til detaljregulering for Husnes kollektivterminal og sentrumsveg, 144/68 m. fl. PlanID 20200011. Plankart er datert 13.09.2023, og føresegner og planomtale er datert 22.09.2023. Delar av følgjande reguleringsplanar vert samstundes oppheva:

PlanID 20110009 Byen Husnes - 143/5 og 144/5 m.fl. – Husnes PlanID 19650001 Troåslia Bustadfelt Planforslaget vert endra i tråd med alternativ utforming av plandokumenta slik det kjem fram av notat datert 07.12.2023 med arkivsaksnummer 2022/356-34, i hovudsak slik:

• Breidda på fortau langs søraustre del av parkeringsareal SPP2 vert redusert til 3,7 meter

• Solplassen vert vidareført i noverande form

• Areal sett av til terminalbygg er endra til kombinert føremål slik at det kan nyttast til parkering inntil bygging blir aktuelt Som følgje av endringane får kommuneadministrasjonen fullmakt til å gjere naudsynt oppdatering av plandokumenta slik at plankart, føresegner og planomtale får god innbyrdes samanheng. Rettshavarar og naboar skal underrettast i samsvar med reglane, og planen skal kunngjerast i lokalpressa og i kommunen sine elektroniske medium. Grunnlaget for kommunal eigengodkjenning er til stades.

Kommunestyret si behandling i møte den 21.03.2024:

NYTT FRAMSETT FORSLAG FRÅ WERMUND VETRHUS, SV:

Kollektivknutepunkt klage Vi vedtok denne planen i førre møte, og den e no blitt påklaga. Ikkje overraskande er SV einig med klagar, og meinar at vi skal ta klagen til følge. Grunngjevinga for dette er knytt til fleire punkt. Og det er mogleg vi ikkje har klart å kommunisere tydeleg nok kvifor vi er så imot dette kollektivknutepunktet. Om denne planen blir satt ut i livet vil det ha store konsekvensar for Husnes spesielt og kommunen som heilskap. For det første HAR me eit kollektivknutepunkt i dag på Husnes. Dette er dimensjonert for maks antal bussar som kan tenkjast å møtast på Husnes på eit gitt tidspunkt. Dette kan takast i bruk i dag, og vera fullverdig etter ein har fått på plass eit venterom. Ein treng ikkje ny regulering, for dagens plan opnar lett for eit slikt bygg. Kommunen vil dra på seg store nye vedlikehaldskostnadar ved å bygga nok eit knutepunkt på Husnes. Behova til kollektivreisende blir tatt i vare gjennom oppgradering av eksisterande busstopp. For det andre er naturkartlegginga openbart mangelfull, som klagar har påpeika. Nokre av dei største artsgruppene er ikkje tatt med i vurderinga. Meir spesifikt sopp, insekter og fugl. Store delar av rapporten framstår som eit skrivebordsarbeid og ikkje grundig nok. Det er eit bilete frå staden i rapporten. Og det som er det viktigaste som det kan synast at ikkje har kome tydeleg nok fram er støydempinga som må til for å ivareta eksisterande bustadar. På side 18-24 i støyvurderinga er dette skildra. Det er snakk om ein nesten 350 m lang og opptil 2 m høg plankevegg som skjærer tvers gjennom hjarta av sentrum. Dette er slikt vi ser langs motorvegane inn til Bergen, Haugesund og andre byar. Vel er Husnes kjent som Handlebyen, men dette er ikkje sentrum verdig. 170 m vegg frå Coop til Bogsnesvegen, og 178 m vegg frå Bogsnesvegen til Borgen advokater. LIKEVEL er ikkje dette nok for fire eksisterande bustadane. Dei må ha ekstra støydemping, enten i yttervegg eller i uteområdet sitt. Med andre ord: Kollektivknutepunkt på Husnes HAR vi allereie, og å regelrett øydeleggje Husnes sentrum slik vi no legg opp til er motsatt av god sentrumsutvikling, for eit tiltak som ikkje er naudsynt. SV kjem difor til å støtta klagar og vil stemma for å ta klagen til følge. Forslaget frå Wermund Vetrhus, SV, om å ta klagen til følgje vart sett opp mot Plan, teknikk og miljøutvalet si innstilling og fall med 11 røyster ( INP, MDG, SV, Svein Åge Vangdal, SP og Jarle Andresen, SP). 24 røysta for Plan, teknikk og miljøutvalet si innstilling.