Spørsmål og svar

Kommunestyret si behandling i møte den 15.02.2024:

Kommunedirektøren orienterer:

Heradstun:

Kontrakten er tildelt firmaet Fuglafjell AS som er lokalisert i Norheimsund. Kontrakten inneheld også leveransar frå fleire lokale firma, deriblant Teigen Bygg og Trelast AS og Byggservice AS. Ettersom det er differanse mellom kontraktpris og avsette midlar i budsjettet, er kontrakttildelinga gjort under føresetnad om finansiering. Prosjektet Heradstun har ei finansieringsramme i handlings- og økonomiplan på kr 55 mill inkl mva, medan kontraktspris er på kr 63.5 mill inkl mva. Det blir arbeidd for å legga fram sak for politisk behandling i samband med finansiering. Dersom det blir politisk vedtatt å auka den økonomiske ramma blir det truleg oppstart i vår, og prosjektet har ei estimert byggjetid på kring 15 månader. Husnes skule Consto AS, som vart tildelt kontrakten med å bygga Husnes skule, har inngått avtale med Brødrene Musland AS om grunnarbeidet for skulen. Det blei søkt om igangsetjingsløyve for grunnarbeidet denne veka, og ein reknar med å kome i gang med vegetasjonsrydding og graving den 04.03.24. Midlar til trygging av skuleveg og nærmiljøanlegg Samferdselsdept. har delt ut midlar til trygging av skuleveg på bakgrunn av søknadar. Kvinnherad har fått midlar til to prosjekt på til saman kr 170.000, fordelt slik:

Oppfølging av kommunestyret sitt vedtak om driftsbygning på gnr. 129 bnr. 4 på Døssland i Uskedalen Bergen kommune sendte tilsynsrapport 4. desember 2023 til eigar Marita Kjærland med kopi til Kvinnherad kommune, Sands advokatfirma DA og Ivar Kåre Døssland. På bakgrunn av rapporten sin konklusjon vedtok kommunestyret den 14. desember 2023 at det skulle sendast førehandsvarsel om søknadspliktig tiltak på låven, og at arbeidet enten måtte tilbakeførast eller omsøkjast. Tilsynsrapporten er ikkje eit enkeltvedtak og kan følgjeleg ikkje påklagast. Bergen kommune sette tre veker frist for skriftleg tilbakemelding, dersom det var kommentarar til rapporten. Kvinnherad kommune etterspurde Bergen kommune om endeleg utgåve av rapporten den 5. februar 2024 som del av administrasjonen sitt arbeid med å følgja opp kommunestyret sitt vedtak. Bergen kommune svara på dette at dei hadde motteke ein kommentar frå tiltakshavar på innhaldet i rapporten. Kommentaren endra ikkje noko på Bergen kommune sin konklusjon og den seier seg ferdig med saka. Kommunedirektøren legg difor til grunn at rapporten som vart sendt i desember blir ståande og at konklusjonen om søknadsplikt er endeleg. Administrasjonen går no vidare med kommunestyret sitt vedtak frå 14. desember 2023. Helse – sjukeheimar, heimeteneste Frå 1. mars vil Tove Omdal være einingsleiar for sjukeheimstenester i Kvinnherad kommune. Dette er ny leiarorganisering. Det vil fortsatt vera lokal leiing ved sjukeheimane: Anne Tangen Rørdal som sjukeheimsleiar ved Husnes/Halsnøy og Tone Tufta Gaugstad som sjukeheimsleiar ved Rosendalstunet. Frå 1. mars vil Ellen Korsvold bli einingsleiar for heile heimetenesteområde i kommunen vår i samband med at Sigurd Næss blir pensjonist denne månaden. Kommunedelplan Omsorg, Helse og sosial - e-post til politikarane Vi har starta prosess med revisjon av handlingsdel til Kommunedelplan (KDP) for omsorg, helse og sosial. Det er sendt ut e-post til alle politikarane for innspel til planen. Innspelsrunden vert avslutta 22.02. Politikarane vert oppmoda om å nytta høvet til å koma med innspel. Kurs i utbyggingsavtalar Advokatfirmaet Harris held kurs i utbyggingsavtalar tysdag 20.02 kl. 12.00-15.00 og onsdag 21.02.kl 08.30-11.30 i kommunestyresalen på rådhuset i Rosendal. Det er nokre ledige plassar og det vert difor opna opp for at fleire kan delta. Sjå Facebook-sida til Kvinnherad kommune, der ordførar oppmodar utbyggjarar, grunneigarar, næringsdrivande, politikarar eller andre som har interesse for temaet om å melde seg på. Synnøve Handeland ny leiar for arealforvaltninga Kvinnherad kommune har gjort tilsetting i jobben som avdelingsleiar for byggesak og geodata. Av fleire gode søkarar fall valet på Synnøve Handeland. I tillegg til erfaring frå ulike roller i næringsliv og frivilligheit har Synnøve også særs relevant erfaring frå både politikk og offentleg forvaltning.

- Eg plukkar opp tråden frå tidlegare leiar i avdelinga og ønskjer å seie at vi har lyst til å vere på lag med verksemder og privatpersonar, og hjelpe til så langt vi kan innafor dei rammene vi har, seier Synnøve. Mellom anna vil vi vekke opp att tradisjonen med bransjetreff der kommunen treff entreprenørar og eigedomsutviklarar med mål om å finne løysingar på felles utfordringar.

- Vidare vil arbeidet med digitalisering av byggesøknadane takast vidare med mål om enklare og raskare prosess både for profesjonelle utbyggjarar og private søkarar. Dette er eit prosjekt som tidlegare avdelingsleiar Natalie Martins Sæberg starta, og som vi no etter kvart kan hauste frukter av. Det er dyktige folk som arbeider i avdelinga sine mange fagfelt, og dei har høg kompetanse. Eg gler meg å vere leiar for dette kollegiet, seier Synnøve sjølv om tilsettinga.

Spørsmål frå :

Kristoffer Tufta, H

Eg ynskjer å stille spørsmål til beredskapen i Kvinnherad kommune.

I «Overordna beredskapsplan 2020-2024» står det lista opp døme på hendelsar med stor risiko i vårt område. Desse døma inkluderer mellom anna atomulukke, epidemiar og forureining (med meir). Krig står ikkje på denne lista.

Den geopolitiske situasjonen har endra seg svært mykje sidan denne planen vart laga. Nabolandet vårt har sendt inn militære styrker i eit anna, sjølvstendig land. Konvensjonell krigføring er tilbake på det europeiske kontinentet.

Kva gjer me som sivil befolkning dersom denne konflikten skulle spre seg til Noreg? På heimesidene til kommunen ligg det ei oversikt over tilfluktsrom i kommunen. Eg kjenner igjen enkelte av desse romma, og eg veit at fleire av desse ikkje kan nyttast til formålet. Me har levd med den luksusen at krig var ein fjern tanke, og tilfluktsrom har heller vore ein arena for miniatyrskyting, styrketrening og lagring av korpsinstrument.

Kvinnherad Kommune huser aluminiumsverk, skipsverft, kraftverk og anna viktig infrastruktur. Kva gjer me som sivil befolkning dersom ein av desse vert eit militært mål?

Eg stiller følgande spørsmål

1. Det har vore omstrukturering av offentlige bygg i bygdene våre. Kva gjer ein t.d i Høylandsbygd når næraste tilfluktsrom vert lagt ut for sal på finn.no?

2. Har kommunen oversikt over kor mange av tilfluktsromma våre som faktisk er brukande til formålet i dag, og ikkje har blitt omdisponert til anna formål (t.d lager)?

3. Kva blir gjort på nasjonalt og kommunalt plan for å få tilfluktsromma våre operative og brukande i ein krisesituasjon? Svar:

Kvinnherad kommune har brukt Statsforvaltaren sin «mal» når ein har utarbeidd overordna beredskapsplan. Kvinnherad kommune sin plan er altså knytt til kriser i fredssituasjon. Statsforvaltaren, Liv Signe Navasete, uttalte i 2022 at ein no vurderte å ta inn krig som ein del av planverket. Dette er framleis ikkje avgjort. Kvinnherad vil følgja opp dei føringane som Statsforvaltaren kjem med.

Innleiingsvis kan også omgrepet totalforsvar nemnast i samband med beredskap knytt til krig. Totalforsvar betyr at det militære forsvaret og det sivile samfunnet samarbeider og gjev kvarandre gjensidig støtte i alvorlege kriser og krig. Den 13. mars i år skal Statsforvaltaren ha øving saman med kommunane Askøy, Bremanger, Etne, Fitjar, Kvam, Samnanger, Stord, Stryn, Tysnes og Kvinnherad. Føremålet med øvinga er totalforsvaret, og truleg vert tema med infrastruktur i ein spent situasjon.

Svar til dei enkelte spørsmåla:

1. Tilfluktsrom er meint å vera til dei som oppheld seg i bygget (t.d. ein skule som har tilfluktsrom skal verna elevane ved den skulen) Det er til ei kvar tid eigaren av bygget som vil ha ansvaret for å halda tilfluktsrommet i forskriftsmessig stand. I Noreg er det ikkje bygd offentlege tilfluktsrom sidan 1998. Dei offentlege tilfluktsromma er bygd i byar og større tettstadar. Næraste offentlege tilfluktsrom for oss (som sivilforsvaret har ansvar for) er på Stord og i Odda. Ein kan lesa meir om tilfluktsrom på DSB sine sider: https://www.sivilforsvaret.no/dette-er-sivilforsvaret/tilfluktsrom/om-tilfluktsrom/

2. Ja vi har oversikt og mange blir brukt til lager. Rydding av lagerfunksjon tek kjapp tid. Vi reknar med at 80% av våre tilfluktsrom vil vera klare for bruk innan 72 timar slik fristen er. Men ca 20% vil vi nok bruka lengre tid enn 72 timar for å klargjera.

3. På kommunalt plan har vi ansvar for å setja tilfluktsromma våre klare innan 72 timar. Jamfør forskrift om tilfluktsrom. Dei aller fleste kan raskt setjast i stand, men slik nemnd over er det også tilfluktsrom som vil ta lengre tid å klargjera. Det er i inneverande budsjett midlar til å gjera ei grundigare kartlegging i samband med istandsetting av tilfluktsrom.

På nasjonalt plan er det Direktoratet for samfunnssikkerhet og beredskap (DSB) og Statsforvaltaren som gjev føringane kva kommunane skal gjera. Vi avventar beslutning på om krig skal takast inn i beredskapsplanane våre. Då blir truleg planane annleis enn i dag. Ei omarbeiding vil truleg bli ei ekstra sak til kommunestyret.

Hanne Kristensen, H:

Det er vedtatt ein 100% stilling til kreftkoordinator i Kvinnherad. Kan ein få ei oppdatering til Kvinnherad kommunestyre om status og korleis denne stillinga som kreftkoordinator fungerer i praksis? Svar:

Administrasjonen forstår budsjettvedtaket som at det skal ytast kreftkoordinatortenester tilsvarande full stilling. Det vesentlege av stillinga (80 prosent) er lagt til ein tilsett. Den resterande femtedelen blir følgt opp av Vurdering og koordineringsavdelinga (VOK), som fordeler arbeidstida si på saker med diagnosar som kreft, demens, ALS, Parkinson med meir. I samband med at gruppa Kreftomsorg i Kvinnherad ved brev har stilt spørsmål kring kreftkoordinatortenestene, vart det sendt svarbrev den 15. februar 2024. Brevet finn de på postlistene, her. Kreftomsorg i Kvinnherad hadde elles eit møte med kommunedirektør, sektorleiar og avdelingsleiar VOK på tysdag denne veka, der det kom innspel til kreftkoordinatorrolla frå eit brukarperspektiv.

Jostein Saghaug, Mdg:

• Ber om at kommunestyret vert orientert om kva svar miljøretta helsevern fekk i forbindelse med purringa på opplysningsarbeidet etter gummigranulatforureininga i strandsona og i og langs Mehlselva?

• Korleis vert snø handtert denne vinteren? Er denne handteringa i tråd med forureiningslova?

Svar:

Spørsmål 1:

I etterkant av synfaring ved Rosendal kunstgrasbane hausten 2023 vart det sett i gang eit arbeid for å finne løysingar på korleis oppryddinga skal gå føre seg, og miljøretta helsevern har spurt om status på dette. Fristen er ikkje gått ut, og det er per no ikkje sendt ut svar på brevet, men ein kan gi ein kort status.

Den 14. desember vart det tildelt midlar for fjerning av gummigranulatforureining i rullering av handlingsprogram i Kommunedelplan for idrett. Etter diskusjonar med idrettskretsen kom det innspel på firma som hadde spesialutstyr for å suga opp gummigranulat. Kommunen har no sendt førespurnad til tre leverandørar om fjerning av gummigranulat rundt banen i Rosendal, og ein reknar med å inngå kontrakt på dette i nær framtid. Vinterhalvåret er eit dårleg tidspunkt for fjerning av gummigranulat grunna snø og is, men det er venta at arbeidet blir igangsett i løpet av våren.

Spørsmål 2:

Vintervedlikehald av banen blir gjennomført av Rosendal Turnlag, og kommunen har ikkje detaljane på korleis dette blir handtert. Kvinnherad kommune er lokal styresmakt med omsyn til forureining, og avdelinga for miljøretta helsevern er orientert om situasjonen kring baneforholda. Administrasjonen er oppteken av å få med erfaringar frå vinterdrifta, når ein no skal rehabilitera banen på ein berekraftig måte.