Spørsmål og svar

Kommunestyret si behandling i møte den 12.12.2024:

Spørsmål og svar kommunestyret 12.12.2024

Per Svindland, Frp

1. Er de mulig å få ung ufør på arbeidstrening?

Ordførar svarar:

Det er absolutt mogleg, og er avhengig av vurderingar om arbeidsevne, kompetanse og arbeidsoppgåver som kan vera aktuelle.

NAV hjelper til med å oppretta arbeidstreningsavtale. Ein vil også trekka fram prosjektet med Unge uføre, som me i budsjettet i dag fann midlar til. Dette er eit viktig fokus for politisk leiing og blir jobba med.

2. Har kommunen en beredskapsplan når strømmen uteblir? Som for eksempel nødaggregat på institusjoner, og telefon-nettet uteblir?

Ordførar svarar:

Ja, institusjonane har rutinar basert på risiko- og sårbarheitsvurderingar, mellom anna knytt til straumbrot.

Når det gjeld straumaggregat, har ein mellom anna det på Rosendalstunet (for den nye delen), Husnestunet har per i dag for den gamle delen av sjukeheimen, men der er ein i ferd med å montera nytt aggregat som dekker heile bygget. Halsnøytunet har også aggregat som dekker heile bygget.

Ved utfall av mobilt nett har dei fleste basestasjonane i Kvinnherad fire timar driftstid etter straumbrot. Nødetatar har prioriterte abonnement hos Telia/Telenor som sikrar dekning dersom den eine leverandøren sitt nett fell ut. Vidare vil alle kunna nå naudetatane, dersom det er eitt mobilnett tilgjengeleg, uavhengig av om ein har abonnement hos den leverandøren. Ved kriseberedskap kan ein kopla til sendar som gjev innandørsdekning for 4G/5G så lenge det er ei anna løysing som gjev tilgang til internett. Ved utfall av både mobilnett og internett har Kvinnherad kommune satelittelefon med periodiske øvingar/testar saman med statsforvaltar. Kommunen har også nødnettsamband.

3. Kan ordføreren orientere om Kvinnherad pakkens status. Hvor mye penger er det igjen i pakken

Ordførar svarar:

Kvinnherad kommune skulle etter planen møta kontaktutvalet 9. desember, og få avklaringar angåande Kvinnheradpakken. Dette møte vart avlyst og utsett til januar 2025. Årsaka til utsettinga var at avklaringar som gjeld finansiering av «krokaprosjektet», truleg vil vera klare då.

Ove Lemicka, Frp På vegen som går langs Husnestunet og opp til Villatoppen er det brot i straumtilførselen, slik at 7-8 gatelys er ute av drift. Slik har det etter dei henvendelsene eg har fått vore i over eit år. Dette medfører helsefarlege situasjonar for bebuarar og tilsette som beveger seg ute og mellom bustadane i området.

Kan Ordføraren syta for at dette problemet vert tatt tak i straks, slik at lysa kjem i drift igjen snarast råd?

Kommunedirektør svarar:

Det er per i dag sju gatelys i Røsslandsvegen som er ute av drift. Arbeidet med å reparera eksisterande lyspunkt, samt å etablera nye lyspunkt mellom Røsslandsvegen og Stølshaugvegen vil bli gjort etter årsskiftet.

Jostein Saghaug, MDG

Gjer greie for status for Uskedalen barnehage i lys av at alle barna i gardsbarnehagen er lova plass der frå juni/juli 2025. Personal, areal, økonomiske konsekvensar, ombygging, medverknad frå tilsette?

Kommunedirektør svarar:

I samband med at Dønhaug Gardsbarnehage legg ned drifta, har foreldra søkt om plass til barna sine i ulike barnehagar. Alle barna har fått plass der foreldra har søkt om plass. Dei fleste barna skal gå i Uskedalen barnehage, men det er også foreldre som har søkt barna sine til andre stadar.

I Uskedalen barnehage blir det no vurdert å gjera mindre ombyggingar for å auka kapasiteten noko. Dette er arbeid som er rekna for å ha mindre økonomisk konsekvens. Auka budsjett til kommunale barnehagar vil bli finansiert av redusert tilskot til private barnehagar. Budsjettfordelinga vil vera meir treffsikker ved å gjere ei omfordeling i revidert budsjett.

Plasstillitsvalte har vore ein del av prosessen, mellom anna kring auke av kapasiteten i barnehagen.