Høyring - NOU 2026:4 Kjernekraft i Noreg

Valle kommune gjev følgjande høyringsuttale til NOU 2026:4 Kjernekraft i Noreg:

1. Valle kommune meiner NOU 2026:4 gjev eit viktig og kunnskapsbasert grunnlag for vidare vurdering av kjernekraft som mogleg del av framtidig norsk energiforsyning.

2. Kjernekraft bør vurderast som del av eit samla framtidig kraftsystem, ikkje isolert som spørsmål om ein enkelt teknologi. Vurderingane må byggje på kva utfordringar teknologien eventuelt skal løyse, og korleis han står seg mot andre tiltak når det gjeld forsyningstryggleik, effekt, klima, natur, kostnader, gjennomføringstid og samfunnstryggleik.

3. Noreg bør byggje kompetanse, forsking, regelverk og institusjonell kapasitet trinnvis og i samsvar med dokumenterte behov. Det må skiljast mellom kompetanse Noreg uansett treng for sjølvstendige vurderingar, tryggleik, beredskap og internasjonalt samarbeid, og kapasitet som fyrst blir nødvendig dersom konkrete kjernekraftprosjekt skal førebuast.

4. Staten bør vurdere både risikoen ved kjernekraft og risikoen ved at Noreg manglar nødvendig kompetanse dersom energibehovet, teknologiutviklinga eller den tryggingspolitiske situasjonen endrar seg.

5. Vidare arbeid bør byggje på ulike framtidsscenario. Scenarioa bør vise korleis ulike utviklingsbaner for kraftbehov, klima, teknologi, kostnader, naturbelastning, tryggingssituasjon og nordisk og europeisk samarbeid påverkar behovet for kjernekraft og andre energitiltak.

6. Kjernekraft må vurderast både som eit mogleg bidrag til energitryggleik og som kritisk infrastruktur med særlege sårbarheiter. Det må vurderast om teknologien reduserer den samla sårbarheita i kraftsystemet, eller skaper nye strategiske avhengigheiter.

7. Eventuelle framtidige etableringar må byggje på høge krav til tryggleik, openheit, lokal og regional medverknad, demokratisk legitimitet og eit tydeleg statleg ansvar for tilsyn, beredskap, avfallshandtering, finansiering og langsiktig oppfølging.

8. Kommunal planmynde og lokaldemokratiske prosessar må respekterast. Staten må på førehand klargjere korleis eventuelle nasjonale tryggings- og energiinteresser skal vegast mot kommunal planlegging, naturverdiar og lokale samfunnsomsyn.

Handsaming i Kommunestyret av sak 85/2026 den 24.09.2026:

Handsaming:

Innstillinga frå formannskapet vart samrøystes vedteken.