Søknad om prosjektmidlar - Stiftinga Setesdal stavkyrkje

1. Kommunestyret løyver 613 030 kr i 2025, 593 030 kr i 2026 og 593 030 kr i 2027 i prosjektmidlar til stiftinga Setesdal stavkyrkja. Løyvinga for 2025 vert finansiert med bruk av disposisjonsfond. Løyvingane for 2026 og 2027 vert innarbeidde i budsjett for 2026 og økonomiplanen for 2026-2029.

2. Løyvinga vert gjeven med vilkår om at stiftinga dokumenterer tilstrekkeleg ekstern medfinansiering frå Agder fylkeskommune eller eventuelt andre aktørar før utbetaling skjer. Kommunedirektøren får fullmakt til å vurdere om dokumentert finansiering er tilstrekkeleg.

3. Løyvinga vert vidare gjeven med vilkår om at stiftinga årleg legg fram prosjektrapport med status for framdrift, økonomi og plan for vidare arbeid. Kommunedirektøren får fullmakt til å fastsetje den årlege fristen for rapporteringa.

Handsaming i Kommunestyret av sak 79/2025 den 24.09.2025:

Handsaming:

Kim Pedersen bad kommunestyret vurdere hans gildskap då han er styremedlem i Aust-Agder museum og arkiv IKS og fråtrådde møtet. Kim Pedersen vart samrøystes funnen ugild.

Gunvor Åkre bad kommunestyret vurdere gildskapen:

Måndag denne veka publiserte Setesdølen eit lesarinnlegg som er kritisk til stavkyrkjeprosjektet på Rysstad. Lesarinnlegget var skrive av mor mi.

Eg har ei bu i Finndalen, og tidleg i haust vart det gjort ein avtale med Knut H Rysstad om at verksemda hans skal fikse pipeløpet på denne bua.

På tysdag fekk eg beskjed om at dei ikkje ville take på seg oppdraget. Grunngjevinga var lesarinnlegget som mor mi hadde skrive.

Det er heilt greitt at ein er ueinige i ei sak. Sjølv om det i dette tilfellet var mamma, og ikkje eg, som var ueinige i saka. Uansett er det er ikkje ok å straffe eller leggje press på dei ein er ueinige med. Når det vert lagt press på politikarar i ei sak kan det påverke korleis dei stemmer.

Difor ynskjer eg å prøve gildskapen min.

Gunvor Åkre fråtrådde møtet.

5 (AP/SP) røysta ugild og 5 (H/BLV) røysta gild. Med ordførars dobbeltrøyst vart Gunvor Åkre funnen ugild.

Innstillinga frå formannskapet vart samrøystes vedteken.