KS Debatthefte 2026 - Tid for taktskifte

Saka er drøfta, og Skjåk kommune gjev med desse innspela eit grundig og realistisk svar på utfordringane i KS Debatthefte 2026. Alle innspel er solid forankra i lokale forhold og nasjonale føringar.

Vedtak frå Skjåk kommune blir oversendt KS Innlandet.

1.Kva må vi gjere i vår kommune dei neste to åra for å auke endringstakta for berekraftig velferd? Satse på digitalisering, førebygging og samarbeid. Skjåk har eit aktivt lokalsamfunn med frivillige, næringsliv og gode møteplassar – dette er ein stor fordel. Bustadutvikling nær tenester er viktig for både unge og eldre. Kommunen må styrkje tenestene gjennom betre bruk av digitale verktøy, høgare digital kompetanse og auka bruk av meistringsteknologi. Klare prioriteringar, tidleg innsats og deling av løysingar mellom kommunar er nødvendige for å sikre berekraftige tenester framover.

2. Korleis kan vi i vår kommune dei neste to åra bruke og mobilisere den arbeidskrafta vi har best mogleg for å løyse samfunnsoppdraget vårt? Vi må auke arbeidskrafttilgangen gjennom inkludering av personar med ulik grad arbeidsevne, betre integrering, tilrettelegging av arbeidsoppgåver og tett samarbeid med NAV. Samtidig må vi arbeide for å framleis ta i bruk pensjonistar som ressurs, utvikle ein god livsfasepolitikk og redusere fråvær for å forlenge yrkeslivet. Vurdere tettare samarbeid og om det er meir føremålstenleg å slå seg saman med andre for å styrke fagmiljø og rekruttering. For å sikre framtidig kapasitet må attraktivitet og samarbeid med næringslivet styrkjast. Dersom deltidsdirektivet blir tolka slik at deltidstilsette har krav på overtidstillegg for alt arbeid utover eigen stillingsbrøk, vil dette i vesentleg grad avgrense arbeidsgjevar si moglegheit til å leggje til rette for fleksibel bruk av tilgjengeleg arbeidsevne. Ei slik ordning kan gjere det meir krevjande å nytte eksisterande personell effektivt og redusere handlingsrommet for å møte bemanningsbehov på ein føreseieleg og kostnadseffektiv måte.

3. Kva må vi prioritere for å styrke beredskapsevna?

Beredskap i Nord-Gudbrandsdalen må byggjast nedanfrå og opp – med lokalkunnskap, samvirke og tillit som fundament. Styrke kommunane sin operative evne, regionale samvirke og lokalsamfunnet si motstandskraft – slik at vi toler meir, reagerar raskere og står betre saman når det verkeleg gjeld. Samarbeid regionalt, gode øvingsrutinar, matberedskap i samarbeid med landbruket, transportberedskap og digital tryggleik er sentrale føresetnader for dette.

Innstilling frå formannskapet vart samrøystes vedteke.