Interpellasjon fra Anne Kristin Bruns (KrF) til bystyret 19.01.2026 vedr. skolegudstjenester

Ordfører takket for interpellasjonen og ga følgende svar:

Det heiter seg at jula ofte kjem litt overraskande på kjerringa. For ordføraren kjem det ikkje like overraskande at vi kvart år har skulegudsteneste som tema i ein eller annan variant.

Når det er sagt, er ordføraren samd i at kristendommen har hatt og har stor betydning for norsk kultur, tradisjon og samfunnsutvikling, og at kunnskap om denne arven er ein viktig del av opplæringa i skulen.

Samstundes er det eit grunnleggjande prinsipp i norsk skule at opplæringa skal vere inkluderande, livssynsnøytral og i tråd med krava i opplæringslova om at det ikkje skal drivast forkynning.

Til spørsmål 1: Korleis legg kommunen til rette for at alle elevar får tilbod om å delta på ei skulegudsteneste?

Kommunedirektøren vurderer at deltaking i skulegudsteneste kan vere ein del av aktivitetstilbodet i skulen før jul og påske, og at skulane i Stavanger har full anledning til å leggje til rette for at elevane får tilbod om å delta på skulegudstenester i samarbeid med Den norske kyrkja eller andre trussamfunn, innanfor ramma av gjeldande regelverk.

Utdanningsdirektoratet presiserer i eigen rettleiing at skulegudstenester kan gjennomførast, føresett at:

• deltaking er frivillig
• føresette og elevar får god og tydeleg informasjon på førehand
• retten til fritak blir respektert
• skulen tilbyr eit likeverdig alternativt opplegg for dei som ikkje deltek

Same rettleiing presiserer at skulegudstenester ikkje er i strid med forbodet om forkynning.

Dette er føringar som ligg til grunn for Stavanger kommune si praksis.

Den enkelte skule vurderer, i dialog med føresette og lokale aktørar, om og korleis skulegudsteneste blir gjennomført, og har ansvar for at både informasjon, fritaksordning og alternativt opplegg er forsvarleg ivareteke.

Til spørsmål 2: Kor mange skular i kommunen tilbyr elevane skulegudsteneste?

Kommunalsjef for skulane har informert om at deltaking i skulegudstenester er relativt utbreidd ved skulane i kommunen.Samstundes blir det ikkje ført ei oversikt over kor mange skular som årleg legg til rette for deltaking i skulegudsteneste.

Interpellanten takket for svar.