Mandat omstillingsprogram

1. Fylkestinget viser til vedtak om å gjennomføre eit omstillingsprogram for Vestland fylkeskommune og godkjenner framlagt mandat med følgande presisering for opplæringssektoren: Kvaliteten i opplæringa skal vere sentralt i arbeidet, og vedtak i heilskapeleg tilbodsstruktur legges til grunn. Omstillingsprogrammet skal sikre tilpassing til endra økonomiske, demografiske og teknologiske rammevilkår.

2. Omstillingsprogrammet skal gjennomgå organisering, oppgåver, arbeidsprosessar, nivå og standard på tenestene, innkjøps- og kontraktsstrategiar. Programmet skal i tillegg identifisere og prioritere kjerneoppgåver og sikre digital transformasjon.

3. Fylkestinget legg til grunn at omstillingsprogrammet skal gje varige innsparingar på minst 100 millionar kroner i perioden 2027–2030. For 2026 godkjenner fylkestinget eit innsparingskrav på 20 mill. kroner, jfr sak om revidert budsjett.

4. Omstillinga skal vere kunnskapsbasert og gjennomførast på ein planmessig måte, med reell involvering av hovudtillitsvalde og vernetenesta gjennom heile programperioden. Fylkesdirektøren kan nytte både intern og ekstern kompetanse i programarbeidet.

5. Fylkestinget legg til grunn at forslag som kan påverke tenestene som Vestland fylkeskommune leverer til innbyggjarane, vert lagt fram for uttale hos aktuelle interessentar som t.d. kommunane.

6. Fylkesdirektøren er ansvarleg for omstillingsprogrammet, og får fullmakt til å organisere arbeidet som eit program med ulike delprogram og styringsstruktur. Arbeidet skal samordnast med budsjett- og økonomiplanprosessen. Fylkesutvalet skal haldast orientert om framdrift og økonomisk effekt og ta stilling til sentrale vegval. Saker som skal handsamast med budsjettkonsekvens skal handsamast i fylkestinget.