Kunnskapsgrunnlag for ferjekaiar knytt til 2030-anbod

Innstilling til fylkestinget

1. Fylkestinget meiner Kunnskapsgrunnlag for ferjekaiar knytt til anbod 2030 gjev eit godt grunnlag for å få fram dei store behova knytt til vedlikehald og investering på ferjekaiane, og samstundes tilby eit godt rutetilbod.

2. Fylkestinget er særs uroa over det store behovet for tilpassing av ferjekaiane til dagens ferjemateriell, og ser at det er behov for ei prioritering. Fylkestinget sluttar seg til prioriteringslista slik den går fram av kunnskapsgrunnlaget.

3. Fylkestinget legg til grunn at kaiinvesteringar og kaivedlikehald vert prioritert i arbeidet med Regional transportplan – Investeringar (RTP-I), og i arbeidet med budsjett og økonomiplanen.

4. Fylkestinget ber om at det i arbeidet med RTP-I vert vurdert å starte på eit større arbeid som ser på landarealet og infrastrukturen knytt til ferjekaiane i Vestland. Tilrettelegging for mjuke trafikantar, kollektivtrafikken, trafikktryggleik og universell utforming er vesentleg inn i eit slikt arbeid.

5. Fylkestinget er positiv til eit tettare samarbeid med andre fylkeskommunar for å drøfte utfordringane knytt til statlege krav og pålegg der det ikkje følgjer med finansiering.