Kartlegging og vurdering av ferjetilbodet i Vestland

Saksprotokoll i fylkesutvalet - 25.11.2024: 1. Ferjer er ein del av vegnettet og er i mange tilfelle rekna som kritisk del av infrastrukturen og beredskapen langs kysten. Ferjetilbodet er viktig for eit samanhengande transportsystem i Vestland – for fastlandstilknyting, fjordkryssing og å binde regionen saman. Ferjedrifta er kostnadskrevjande for fylkeskommunen, og tilbodsnivået blir tilpassa endringar i reisestraumar både ved vekst og reduksjon. 2. Fylkesutvalet ser forslaget om retningslinjer for ferjetilbodet som eit viktig grunnlag for å avklare tilbodsnivået for ferje i nye driftskontraktar. Retningslinjene blir lagt til grunn mellom anna for det vidare arbeidet med førebuing av nye driftskontraktar. Ein presiserer at omsyn til næringsliv er ein del av punktet «befolkning og samfunn». 3. Fylkesutvalet ber om at det blir arbeidd vidare med tiltak for styrking, og omprioritering, av ressursane innanfor ferjesektoren, som førebuing til nye driftskontraktar og heilskapleg arbeid for ferjetilbodet i fylket. I dette arbeidet skal det òg vektleggast om sambandet har andre omkøyringsvegar, med ekstra fokus på opningstid der det ikkje er akseptable omkøyringsmoglegheiter.