Regional transportplan - Investeringar - Rullering 2024

Saksprotokoll i Fylkesutvalet - 05.06.2024 1. Fylkestinget sluttar seg til Handlingsprogram RTP-Investeringar 2024 slik det ligg føre, og legg denne til grunn for det vidare arbeidet med budsjett 2025 og økonomiplan 2025-2028 fram mot fylkestinget i desember 2025. 2. Fylkestinget registrerer at det økonomiske handlingsrommet for nye store prosjekt er avgrensa. Fylkeskommunen skal ta vare på det vegnettet vi har, utbetre der vi kan, og byggje nytt der vi må. Fylkestinget legg til grunn at rammene til trafikktrygging samt til utbetring og vedlikehald av eksisterande vegnett vert vidareført. Midlane som etter grøn bok er avsett til skredsikring skal i sin heilskap nyttast til skredsikring. 3. Fylkestinget held fast på tidlegare prioritering innan skredsikringsområdet, og fv. 609 Heilevang og fv. 49 Steinsdalen-Eikedalen (Tokagjelet) skal prioriterast i første omgang. Etter dette arbeider ein vidare med fv.55 Esefjorden, fv.49, Nordrepollen-Austepollen, fv.79 Steinstøberget, fv.5600 Arnafjorden og fv.5704 Oldedalen, i tråd med tidlegare vedtak i handlingsprogrammet for RTP. Utvikling av innovative skredsikringstiltak skal prioriterast, og fylkestinget legg til grunn at dette skal finansierast gjennom løyvinga til skredsikring 4. Fylkestinget ber fylkesordførar vidareføre dialog med sentrale styresmakter for å endre ferjeavløysingsordninga med sikte på minske belastninga for fylkeskommunen sin samla økonomi, og ber fylkesdirektøren kome tilbake til sak i oktober om dette. Det betyr ikkje at saka om Atløysambandet og Masfjordsambandet skal settast på vent til etter denne saka. 5. Fylkestinget er uroa for at store delar av fylkesvegnettet ikkje er tilpassa det klimaet ein står ovanfor. Fylkestinget ber om at omsynet til samfunnstryggleik knytt til naturfare må vektleggjast i større grad i prioritering av tiltak på fylkesvegane. 6. Fylkestinget legg til grunn at det skal vere ein balansert prosjektportefølje, der det både er ein planreserve, og at det samtidig er realistisk at planane kan gjennomførast. Fylkestinget legg til grunn at oppstart av nye forprosjekt og reguleringsplanar skal avgrensast til prioriterte politiske tiltak. 7. Fylkestinget viser til at fleire vedtekne reguleringsplanar krev store naturinngrep og er for omfattande i forhold til den økonomiske situasjonen. Fylkestinget ber fylkesdirektøren om å kome tilbake med eiga sak om prosjekt der det er behov for å vurdere ein enklare standard, samstundes som trafikktryggleiken må vera sikra. 8. Fylkestinget ber fylkesdirektøren vurdere om det er midlar til følgjande nye tiltak i økonomiplanperioden 2025-2028: a. Fv. 61 Naveosen- Brubakken b. Kollektivterminal Leirvik, Stord, inklusiv tiltak for å betre tilbodet for gåande og syklande til terminalen. c. Fv. 541 – Tjernagelvegen 9. Fylkestinget ber fylkesdirektøren om å arbeide vidare med strekningar på det lågtrafikkerte vegnettet for strekningsvis utbetring fram mot neste rullering av RTP investeringar i dialog med kommunane. Dette skal samordnast med arbeidet med forsterkningsprogrammet og dekkeleggingsprogrammet. I første omgang ber fylkestinget om at det vert utgreidd vidare strekningstiltak på følgjande strekningar: a. Fv. 607 Hyllestad b. Fv. 576 Mundheim-Tørvikbygd 10. Det er stor forskjell på samferdsel infrastruktur sin standard i Vestland i forhold til mange andre områder i landet. Ein ser at denne forskjellen auke. Fylkestinget ber fylkesordføraren samordne seg med andre områder med mye dårleg standard og organisere eit arbeid mot Regjering og Storting for å få en reell utjamning av faktisk veg og transportstandard mellom Vestland og dei betre stilte områder av landet.