Tilstandsrapport for vidaregåande opplæring i Innlandet fylkeskommune skuleåret 2025-26

1. Fylkestinget tek tilstandsrapporten for vidaregåande opplæring i Innlandet skuleåret 2025–26 til orientering.

2. Fylkestinget ber fylkeskommunedirektøren vidareføre arbeidet med å leggje til rette for at elevar, lærlingar og vaksne deltakarar gjennomfører opplæringa, som eit grunnleggjande verkemiddel for å redusere utanforskapet i Innlandet.

3. Fylkeskommunedirektøren blir beden om å vidareutvikle dialogen med kommunane om overgangen frå grunnskule til vidaregåande opplæring. Arbeidet blir forankra i eksisterande samarbeidsarenaer med kommunane.

4. Fylkestinget viser til vedtak i sak 66/25 og ber fylkeskommunedirektøren vidareføre arbeidet med å styrkje elevane sin kompetanse i matematikk og rekrutteringa til realfag.

5. Fylkestinget merkar seg at fråværet i skulen er redusert, og at tilstandsrapporten stadfestar den nære samanhengen mellom nærvær og fullføring. Fylkeskommunedirektøren blir beden om å vidareutvikle arbeidet med å sikre høgt nærvær i opplæringa.

6. Fylkestinget merkar seg nedgangen i mobbetala, men ber fylkeskommunedirektøren følgje opp dei etablerte rutinane og den systematiske oppfølginga av arbeidet for eit trygt og godt lærings- og arbeidsmiljø.

7. Fylkestinget merkar seg arbeidet som er gjort gjennom Handlingsplan for psykisk helse, og ber fylkeskommunedirektøren sikre at innsatsområda frå planen blir vidareførte som ein del av fylkeskommunen sitt arbeid.

Aud Gunnhild Hove (Sp) fremja slikt tilleggsforslag punkt 6 - Mobbetal: " Fylkestinget merkar seg nedgangen i mobbetala i snitt for Innlandet i Vg1, men at Vg2 og Vg 3 har ein auke frå skuleåret 2024/2025. Det er også store forskjellar mellom skulestadane. Fylkestinget ber fylkeskommunedirektøren følgje opp dei etablerte rutinane og den systematiske oppfølginga av arbeidet for eit trygt og godt lærings- og arbeidsmiljø."

Røysting:

• Tilleggsforslag til punkt 6, fremja av Hove (Sp), fekk 19 røyster (10 Sp, 3 SV, 2 PP, 2 V, 1 KrF og 1 INP) og fall mot 38 røyster (18 Ap, 9 H, 5 FrP, 2 MDG, 2 R og 2 U).

• Innstillinga frå hovudutvalet for utdanning vart deretter samrøystes vedteken med 57 røyster (18 Ap, 9 H, 2 MDG, 10 Sp, 5 FrP, 3 SV, 2 U, 2 V, 2 R, 2 PP, 1 INP og 1 KrF).